Khale ndziku rindzerile (Tsonga love poem) by Nkateko Maluleke

Dyambu arixa rithlela ripela
Tinguva ticica, ku hisa kuthlela ku titimela
E miankanyweni na le milorhweni andziku vona kambe andzitwa uhlwela
Na vanhu avandzi hleka loko ndzivabyela leswaku ndzi yimele wena

Loko ndzahaku rindzerile ndzihlangane na vanhwana votala
Vanhwana vo saseka vaswivumbeko swo hambana hambana
Van’wana voleha, van’wana vo koma
Van’wana vobasa, van’wana va ntima

Kambe eka hinkwavo akuri hava loyi andzi koka rinoko hikuva avangari wena
Ambilwini yanga andzi switiva leswaku wena ulendleleni siku rin’wana hitahlangana
Andzitshama ndziri karhi ndziri khongerisa siku ra kona
Siku leri ndzinga hlangana na wena murhandziwa mina

Loko ndzi ku vona ro sungula swa mampela, andzitwa onge ndzo lorha
Mbilu ya mina yiba hiku hatlisa no nonoka hinkarhi wun’we
Matsolo ya rhurhumela kungari na xirhami
Nyuku wu dzururuka exikandzeni onge ndzilo cheriwa hi mati

Mihloti yi khapa khapa wonge ndzilo neriwa hi mpfula
Ndzi talelwa ndzi tsandzeka no hefemula
Marha ya oma endzeni ka nomo loko ndzilava kuku hlamula
Ndzi khomiwa hi manghanghamele loko ndzi vulavula kuve ndzitiva ndzingari na wona

Mafambelo ya wena wonge wova ntsumi yale tilweni
Swingingi swaku aswifambisana na mabelo ya mbilu yanga
Ndzitikume ndzi lahlekile amatihlweni ya wena
I nkateko lowukulu eka mina ku rhandziwa hi wena

Andzingaswitivi leswaku rirhandzu I ncini loko ndzingase hlangana na wena
U humesa vunene eka mina
Kuku anakanya ntsena switisa kunwayitela exikandzeni xa mina
Wun’wani muyimbeleri uri “loko urihava mbilu ufafa”
Kambe mina aswindzi vilerisisi hikuva ya mina yi hlayisekile emavokweni ya wena.