Mina na wena (Tsonga love poem) by Nkateko Maluleke

Mina na wena hakunene ha fanelana
Onge hilotswala hi munhu un’we phela hova mahahlwa
Hi rini hi rhandzana? uhm se ikhale
Hikari hiri swin’we
Hiwa hi pfuka swin’we

Hihlangana na swiyimo swobiha na swo saseka
Hiwa hithlela hi pfuka
Hi rila hi thlela hlekelela
Hi khunguvanyisana hithlela hi rivalelana

Wena u voko ra mina ra xinene, ndzitiba xifuva hi wena
U nenge wa mina wa ximatsi, ndzi tiya hi wena
Half ya xiphemu xa mbilu ya wena na half ya xiphemu xa mbilu ya mina loko swihlangana swiendla mbilu yin’we
Leyi baka xikan’we hinkarhi wun’we

U fanele uri xitulu hikuva loko ndzi tshamile ndzi ehleketa hi wena
Kumbe mbhedo hikuva ndzi tlela ndzi lorha wena
Ndzita kurhandza hambi loko se uhume tipfi
Ndzahata kurhandza na hambi loko dyambu ringa pela mundzuku ringaxi

Andzinge suki ethlelo ka wena hambi loko misava yinga dyiwa hi mati
Ndzita khomelela eka wena hambi loko tintswava tinga mbombomela elwandle
Ndzita kurhandza masiku ya mutomi bya mina hinkwabyo
Ndzita veka kunavela ka wena emahlweni hi minkarhi hi nkwayo

Hambi loko vanhu vangahi zondza etikweni
Mina na wena hi tsariwile etilweni
Dictionary leyinga endzeni ka mbilu yanga yiku hlamusela tani hi ntsako ni rirhandzu
Eka hinkwaswo swivumbiwa swa Yehova ndzi rhandza wena ngopfu